CodeSyntax LibreCon 2014 konferentzian, kronika

2014/11/17
Balio dezatela lerro hauek gure enpresak LibreConen izan dituen parte-hartze zehatzak zerrendatu eta aipatzeko.

Iragarri genuen moduan, pasa den astean Bilboko Euskaldunan izan ginen LibreCon 2014 topaketan parte-hartzen. Topaketaren balorazio orokorra egin dugu jada, eta ez nator hangoa hemen errepikatzera. Lerro hauekin gure enpresak eduki duen parte-hartze zehatza zerrendatzea beste asmorik ez dugu.

Open Living Lab Eibar: software librearen filosofian oinarrituriko living lab kasu erreala

Ez gara oso zaleak izaten amaitu gabe dauden proiektuak iragartzeko, baina LibreConen parada aprobetxatu nahi izan genuen esperientzia honen berri emateko. Eibarko udaleko Mari Jose Telleriaren sarreraren ostean Josu Azpillaga lankideak proiektuaren nondik norakoa azaldu zuen.

Open Living Lab Eibarren Zermik eta Tekniker enpresekin elkarlanean gabiltza smart cities proiektuetan abian jartzen diren hainbat eszenategiren probak egiten. Funtsean, hainbat neurketa egingo dituen sentsoreak jarriko ditugu herrian zehar, eta datuak modu irekian eskainiko ditugu API bati esker, horiekin edozein aplikazio sortu dadin.

Free software for languages big and small: multilingual openness

Akaso ez duzu sekula entzun nola sortu zen CodeSyntax, baina hitzaldi honen oinarrian istorio hori dago. Eleaniztasun lokaletik globalera. Software librearen alde egin beharreko derrigorrezko apustua.

Luistxo Fernandezek eman zuen hitzaldia eta berak sarri aipatu ohi duen moduan menua eta janaria bereiztu zituen Twitter bezalako interneteko proiektuetan: interfazea eta jendearen mezuak.

Tribual: datu libreetan oinarritutako aplikazioa

ESLEren txokoan hitz egin zuen Aitzol Naberanek etxe honetan sorturiko lehen Android aplikazioari buruz. Jakingo duzuen moduan Tribual galdera-erantzunen joko bat da, mekanika itsaskorra duena. Aitzolek ez zigun hitz egin app-aren garapenaz, galdera-sorkuntza prozesuan egiten dugun datu libreen erabilpenaz baizik.

CodeSyntax-en stand-a eta Eneko Astigarraga

Goian aipaturiko lankideak hizlari egon ziren bitartean, beste batzuk gure stand-ean egon ginen bertaratzen zitzaizkigunekin hitz egiten. Aspaldiko urteetan aurrenekoz egon gara azoka batean gure espazio propioarekin, eta asko ikasteko aukera izan dugu.

CodeSyntax - Librecon stand

CodeSyntax - Librecon 2014 stand

Stand-ean geundenok geldi xamar egon garen bitartean, gure lankide Eneko batetik bestera ibili behar izan zen ESLEko presidente gixa. Antolakuntzan parte-hartze aktiboa izan du Enekok eta topaketan bertan hainbat zeregin izan zituen agerikoak direnetaz gain: irekiera, harrera, hitzaldiak eta abar.

Eneko Astigarraga - Librecon 2014

Amaitzeko, komunikabideetan oihartzun handia izan du LibreConek. Hainbat egunkaritan agertu da Eneko, konferentziaren aurretik eta ondoren. ETBko Azpimarra saiora Enekoz gain Josu Azpillaga ere joan zen. Hemen grabazioa:

Erantzun

Erantzuna emateko identifikatu egin behar zara, gure webgunean erabiltzaile bat sortuz edo zure Twitter edo Facebook kontua erabiliz.

Mikel Lizarralde

Marketing arduraduna. Hobera egin du: lehen altzariak saltzen zituen.