TBX aplikazioa: zer ari da mugitzen euskarazko Interneteko bideoetan?

2018/01/24
TBX proiektua berritu dugu. Bere web-eko agerpena hobetzeaz gain (funtzio berriekin), aplikazio bat ere garatu dugu. Unean unean euskaraz Interneteko bideoetan biralki zer ari den mugitzen jakiteko, instalatu TBX app berria.
TBX aplikazioaren interfaze batzuk.

TBX aplikazioaren interfaze batzuk.

iOS/iPhone eta Android sistemetarako dago aplikazioa garatuta, eta Google Play eta iTunes aplikazio dendetan aurkituko duzue.

Aplikazioak TBX.eus webguneak dakartzan funtzionalitate oinarrizkoak ditu, zer dagoen pil-pilean unean unean, astean, eta azken hilabetean, baina webgunean garatu berri dugun funtzio berri bat ere badu: bilaketa. Jakin badakizu bideo jakin bat ibili zela 2017ko hasieratik aurrera (TBX martxan hasi zenetik), bilaketa batekin aurkituko duzu. Adibidez, bilaketa arrunt bat (web interfazean kasu honetan), San Juan Sua, zenbait bideo erakutsiko diguna.

Aplikazioaren beste berezitasun bat da notifikazioak jasotzeko aukera. Bideo bat ikuskatzeetan nabarmentzen ari bada, ohar bat jasoko du erabiltzaileak. Egunean bi edo hiru ohar gerta daitezke, gutxi gora-behera; abisu gehiegi direla iruditzen bazaizu, notifikazioak ezgaitu ditzakezu, noski.

Webgunearen berrikuntzari dagokionez, ez bakarrik bilaketa aktibatu da. Artxibo bat ere egin da 2017ko otsailetik aurrerako euskarazko bideogintzan nabarmendu diren bideoak jasotzen dituena. Hilabete edo are egun zehatz bat ere aukera daiteke, egun horretan zer ikusi edo partekatu genuen gehiago jakiteko.

Adibidez, 2017ko urriaren 1a, erreferendumaren eguna Katalunian... ba hari buruzko euskarazko bideo batzuk hemen dituzue.

Aplikazioa garatu da Eusko Jaurlaritzaren eta Gipuzkoako Foru Aldundiaren IKT dirulaguntzei esker, besteak beste.

Nafarroako AEK
2018/01/26 14:42
Eskerrik asko, bai horixe: oso tresna interesgarria iruditzen zaigu. Iaz ezagutu genuen, eta noizean behin ibiltzen gara.
Dena den, zalantza bat geratu zaigu; batzuetan iruditzen zaigu sailkapenean duten postuak ez duela lotura ikustaldi kopuruarekin. Zer dela eta ikustaldi gehiago duen bideoa batek ranking-ean beherago egotea?
Eskerrik asko

Erantzun

Erantzuna emateko identifikatu egin behar zara, gure webgunean erabiltzaile bat sortuz edo zure Twitter edo Facebook kontua erabiliz.

Luistxo Fernandez

Proiektu asmatzailea. Diplomaziaren guru bat.